Yuang Pangantuak Jo Yuang Pangantuik

Yuang Pangantuak Jo Yuang Pangantuik

Yuang Pangantuak jo pangantuik

Dek banamo Buyuang Pangantuak karano dima duduk sinan mangantuak, bilo bajalan acok ma angguk angguk, basobok kasua langsuang mancangkiluk. Yuang Pangantuak ko bakonco palangkin samo Buyuang Pangantuik.

Sabab banamo Yuang Pangantuik karano remot kontrol angin e sabana konselet. kantuik ko malapoh tiok sabanta se, baun e iyo sabana sero, tapi jaan salah, kantuik Buyuang Pangantuik ko tanyato punyo khasiat ubek nan luar biaso. Kalau adoh urang nan tasumbek aka e, bisa lapeh sumbek e tu kalau mancium baun kantuik si Buyuang ko.

Suatu hari Yuang Pangantuik jo Yuang Pangantuk ko sadang duduk ma-unju-unjuan kaki di pondok buruk ditangah sawah dikampungnyo. Ruponyo urang baduo tu sadang tauncang bana,  muncuang tu gali-gali bana untuk di asokan agak sabatang duo batang rokok.

" ambo ado ide Ntuik, awak pai ka kandang ayam uwak Rohana, awak ambik talua ayamnyo untuk pambali rokok... ba a agak hati?". usul Yuang Pangantuak.

" itu namo e maliang, kok abak  den tau,  kanai lacauik den dek rotan beko", jawek Yuang Pangantuik.

" kok waang pancaan kantuik gadangv waang tu iyo ketahuan mah", jawek Yuang Pangantuak.

" Bisa den tahan kantuik den, tapi kalau tibo dikandang ayam tu, waang alah lalok se samo ayam tu...?. Kok ayam tu batino, bisa duo talua e sahari karano waang lalok jo ayam tu rancak mah. Tapi kalau ayam tu seteres gara-gara lalok jo waang kiro-kiro apo nan tajadi?". sindia buyuang pangantuik.

Dek alah pasai batangka, akhir e urang nan baduo tu sapakaik juo pai maliang talua ayam uwak Rohana tu. Baru sampai masuak kandang ayam tu, tibo-tibo tadanga lo pintu kandang dibukak urang. Tabik takut urang nan baduo tu. Yuang Pangantuik mancubo manahan kantuik e sambia manyuruak jan sampai ketahuan dek urang an baru masuk tu. Yuang pangantuak mancubo mancari sabuik karambi nan baserak dalam kandang tu untuk manyumbek lubang knalpot si Buyuang Pangantuik.

Rupo e nan masuak tu urang maliang ayam, badan e sabana badagok. Antah ilmu apo nan di pakai dek urang maliang tu, satiok ayam nan di ambik e dimasuakan dalam karuang indak babunyi saketek juo doh.  Dilain tampek Yuang Pangantuik indak bisa manahan lai doh walau knalpot e alah di sumbek jo sabuik karambi.

Tibo-tibo sumbek knalpot ko lapeh, malapoh kantuik Yuang Pangantuik ko, bunyi e labih kareh lo dari meriam tomong . Mandanga bunyi cando bom hirosima malatuih tu,  urang maliang tu takajuik dan langsuang lari kalua kandang. Ayam nan di ambik tu tatingga dalam kandang.

Dek mandanga heboh dikandang ayam, uwak Rohana ko kalua dari rumah e, nampak sakileh urang nan lari cigin dari kandang ayam e. Dakek Pintu kandang ayam tu nampak Yuang Pangantuik jo Yuang Pangantuak. Uwak Rohana maanggap urang nan baduo tu nan mambuek urang maliang tu lari katakutan, Sebagai  hadiah dari Uwak Rohana, Yuang Pangantuik jo Yuang Pangantuak di agih sikua sorang ayam batino.



Tonton juo yo sanak youtub Tampan Minang
Youtube   : https://www.youtube.com/channel/UCFOiFLcLUqKi2xdAnFb1qVw

Padang, 14 September 2015
Afma Tampan