Carito Lawak Minang: Pa Ubek Sakik Utak

Carito Lawak Minang: Pa Ubek Sakik Utak

Ilustrasi Carito Lawak Minang

Lah lamo indak karimbo
lah taba lo rumpuik di pamatang
lah lamo lo awak indak bacarito
dek badan sibuk dikaja hutang

Ado pantun lamo sanak;
Kabau baranak jawi manyusu
sayang jo anak balian baju....

alam takambang jadi guru, barito baserak dari dulu, iyo sayang mande ka anak sapanjang jalan, tapi sayang bapak ka anak sapanjang panggalan.Tapi kalau ditungkuik ditalantangi,
ditampih bareh ditampih
dipilih atah ciek ciek
bana nan badiri sendiri
nan bungkuk makanan saruang
tabungkuak mako mararuang
kelok jalan balikmu liku
kelok lidah dima katuju
antah iyo antah indak
dek kaba urang nan bakari

tanyato kalau dia asa jo di usuk, fakta nan tajadi bapaklah nan paliang sayang ka anaknyo dibandiang ka bininyo.

bak nantun caritonyo sanak;
laki-laki tu baprinsip dima bumi dipijak di sinan langik di junjuang
dima padusi nampak tacelak di sinan inyo main tanuang.

partamo kalau laki-laki tu nampak anak urang pasti takana anaknyo. Bak nantun bana sayang inyo ka anaknyo. Tapi kalau inyo nampak bini urang mako dilupoannyo bininyo. Sebuah bukti inyo labih sayang ka anaknyo dari ka bininyo.

Kaduo, bilo anaknyo malam hari indak amuh lalok, pasti disuruhnyo lalok, tapi kalau bininyo lalok pasti dijagoannyo.

Katigo kalau anaknyo lalok indak basalimuik pasti di salimutinyo, tapi kalau bininyo basalimuik pasti di ungkai salimuiknyo...

Jadi nan pas sabananyo, laki-laki tu sayang ka anaknyo sapanjang jalan, sayang kabininyo nan sapanjang panggalannyo.....

antah iyo antah indak
jan masuakan bana ka hati yo sanak carito ko
sabab kaba urang nan dikabari
antah iyo antah indak
simak sajo sacaro bijak
untuk pa ubek-ubek sakik utak
hahahahahahahahaha

Padang, 8 Januari 2016
Afma Tampan