Carito Lawak Minang: Lalok di Lua

Carito Lawak Minang: Lalok di Lua

Lalok di Lua

Sajak kaus lampu si Pudin ko kanai daram dek si Amaik Mada, Pudin ko mulai takana bana dan banyak barubah. Biasonyo bapantang karajo kasa, suko e mamalak urang se, kini Pudin anak kampus ko mulai kuliah di ABBA alias Angkek Batu di Batang Aia.

Si Lela nan jadi urang rumah Pudin, sabana sanang bana ko a hati e mancalik udo e amuh bakarajo kareh, mamacah batu, maonggok batu jo ma angkek batu. Walau banyak urang mangecek bahwaso e di zaman susah ko sabana susah lo mancari rasaki, manga nan halal, nan haram se susah mancari e, tapi Pudin ko tatap mancari rasaki nan halal walau susah bana.

Hari pagi Pudin alah ka batang aia , pulang  sore lai mambao pitih agak saratuih sampai saratuih limo puluh ribu, " Lapeh juo untuk balanjo rumah, pambali bareh jo lauk kariang agak saiku", kato Pudin. Tibo dirumah bini e bagalak sanang mancalik parubahan udo Pudin e tu.

Karajo di batang aia jadi kuli galian c ko modal e martil, panggali, pangku, karanjang. Kok urang mintak batu pacah bakarajo kareh lah martil, kok urang minta timbunan bakarajo kareh lo panggali, pangku jo karanjang. Kok urang lai mamintak batu bulek se hanyo panggali nan paralu untuk pancukie batu nan tabanam. Kok sanak ingin tahu ba a bana padih e jadi kuli di batang aia tu, cubolah agak sakali duo, apolai kalau matohari paneh garang, ndeeeh... paluh untuk bisuk tapaso bakaluan kini-kini.

Minggu partamo sampai minggu kaduo, hasil pancarian kuliah di ABBA tu lai di setor ka induk bareh e nan banamo si Lela tu, tapi masuk minggu ka tigo, iman si Pudin alah mulai lo bakucak.

Katiko siap mamuek batu siang tu, Pudin istirahat di lapau nan adoh dakek batang aia tu, sadang lamak istirahat duduk malapehan tarangah, basuarolah di si Koron nan babadan hitam badagok, " lah... lah...  mulai wak lai. ...!", imbau si Koron ka kawan-kawan nan sadang duduk di lapau tu.

" Ba a ka mulai, awak baru barampek, masih kurang sorang lai", jawek si Jono nan sadang asyik se jo hpnyo chatingan di fesbuk.

Mancalik si Pudin ado pulo di lapau tu, sajak mamuek batu ndak pernah sato bahampok di sinan doh, mako bakatolah si Koron," Hoi... Din, kurang sorang a..!, cubo pulo waang adu pitih waang tu disiko, untuang-untuang lai batino. Awak mancari pitih, cubolah nikmati pulo pitih pancarian tu, indak disetor se ka urang rumah sadonyo doh, bantuak anggota ISTI  ( Ikatan Suami Takut Istri) waang mah", kecek si Koron manciracau.

" Muncuang waang iyo indak balabel doh Ron....! waang nan anggota ISTI....hape se di pareso urang rumah tiok sabanta..... Jadilah sato den ciek, main ketek-ketek se yo, tigo ribu se tangah e", jawek Pudin tamakan rayuan kawan-kawan untuk ba hampok.

Partamo main song Pudin bahati sanang se karano manang taruih. Sarangkai tatap dirangguik Pudin satiok Putaran, lereang, kawin, song. Mancalik karatu Pudin tagak tali, nan kawan maraso cameh kok cakak indak ka babaleh mako Kawan minta tuka karatu hijau tu jo karatu merah. Sajak karatu song diganti, karatu Pudin langsuang turun payuang, sagalo pitih manang tadi alah tandeh, tamasuk upah muek batu dari pagi sampai siang tadi. Hari sore pitih alah habih, Pudin tabik manuang, upah bakureh mamacah batu jo mamuek ka ateh oto tadi ndak ado samiang jo lai, apo ka jawek tanyo induk bareh beko kalau tibo dirumah.

Walau barek malangkah, katiko wakatu sarah tarimo rangik jo langau sanjo barabuik magrob tu, Pudin alah sampai dirumah e, " Assalamualaikum Lela, uda Pulang....!", kato Pudin.
" Waalaikum salam. ba a ko tujuh karuik kaniang uda, apo garan nan tajadi?", tanyo lela dek mancalik muko Pudin bantuak baruak damam se.

" Itulah dek Lela, dari pagi uda ka batang aia, ndak bisa babuek apo-apo doh, aia gadang, oto ndak bisa masuk doh", kato Pudin baduto ka induk bareh e tu.

" Sabalah da, rasaki rimau ndak ka dimakan musang doh....  masuklah uda, tu makan malam uda alah Lela siapkan", kato Lela mahibur galau hati laki e tu.

Isuk pagi Pudin alah barangkek lo ka batang aia balik, sampai siang alah tamuek batu duo oto. Pitih dapek di adu pulo balik kok lai batino pitih tu. Samo jo kajadian ka patang, hari sore awak kalah, sado nan disaku sabana tandeh. Pudin pulang karuimah, tibo dirumah bakecekan ka si Lela balik bahwasonyo aia gadang, oto ndak adoh nan masuk. Tapaso Lela basaba mandanga laporan udo e tu.

Hari ka tigo bantuak itu juo, ndak mambao pitih karumah doh dek habih bajudi song di batang aia tu. Dek lela ko alah dapek laporan mungkin tantang parangai laki e ko nan bahampok se di batang aia tu, katiko sampai dirumah dan mangecekan ka bini e bahwaso inyo alah pulang, langsung se bini e tu mangecek dari dalam rumah mamburangsang, " LALOK SE DILUA DA...! DIDALAM AIA GADANG....! OTO NDAK BISA MASUK DOH....!.

Alamak, gara-gara bahampok se karajo, tapaso Pudin lalok dilua samalam tu.

Basambuang ka : Ulah Manyabu

Tonton juo yo sanak youtub Tampan Minang
Youtube   : https://www.youtube.com/channel/UCFOiFLcLUqKi2xdAnFb1qVw

Padang, 12 September 2015
Afma Tampan