Baretong di Hari Tarang

Baretong di Hari Tarang

Spanduk Ultah BPNB Padang

Malam kapatang (red:Jumat 11/9/15), ambo di undang jadi tukang bao acara  Baretong di Hari Tarang Ulang Tahun Balai Pelestarian Nilai Budaya  nan ka 17 tahun, di Balimbiang Padang. Urang nan manonton iyo sabana rami, maklum se malam tu manampilkan Kim Nedy Gampo.Nampak hadir utusan Cagar Budaya dari Batu Sangka, dari Dinas Pariwisata Provinsi, Dinas Pendidikan  dan Kebudayaan Provinsi, Dinas Kebudayaan dan Pariwisata Kota Padang, camat Kuranji, dari sasaran silek sarato sanggar-sanggar seni, pokok e rami bana ko a.

Mulailah ambo bukak acara tu, " dimano titik palito, dibalik telong nan batali, elok kito mulai sajo acara ko, ndak samo sanang dalam hati'., kato ambo sok-sok santiang lo bapantun

Urang batapuk tangan, ambo baranti mangecek sabanta, sudah tu ambo sambuang balik," awak di Minang ko iyo sabana hebat, kalau di tampek lain jikok datang gampo urang panik jo rusuh, tapi disiko gampo datang awak basanang hati basorak-sorak", kecek ambo sambia mancalik ka Nedy Gampo, mukasuik dalam hati di puji-puji Nedy Gampo ko dek harok uang salek saketek sahabih acara beko.

" Hadirin nan kami hormati;
 Buruang si nurak buruang si nuri
manari-nari ateh pamatang
siapkan kupon calik kamari
kito main kim sambia badentang".

Ambo salasai mambukak acara, Gampo naik urang basorak  dendang dan lagu kim langsuang dimulai. Hadiah nan di sadioan panitia ndak saketek banyak e doh. Mulai dari buku tulih, pakaian dalam, jam dindiang, kompor 36 sumbu, dispenser sampai ka kulkas duo pintu tigo jendela sarato hadiah utama barupo HP nan bisa baselfi ria. Kiro-kiro itulah agak hati ambo nan ado dalam bungkusan hadiah tu.

Kalau aksi pangguang Gampo jo gayanyo nan khas tu iyo sabana mandayo penonton, tapi nan marumeh paruik ambo dek Gampo ko bilo nan manang tu gadih rancak, kupon ko ndak di pareso bana doh, hadiah langsuang inyo nan ma agihkan, tu urang nyo suruah ba babang ka inyo.

Tapi kalau nan manang tu laki-laki atau padusi nan agak ba umua, kupon ko lamo bana pareso e, tu hadiah ambo di suruah ma agiahan, urang di suruh lo ba om ka ambo. Kok ka berang awak ba alah, honor awak tagantuang dek inyo.

Jam 12 malam acara salasai, hadiah Utama dapek dek Cintya anak SMP nan manih rancak. Pak Nurmatias salaku kapalo BPNB berkenan memberikan langsuang hadiah utama tu.

Dirgahayu BPNB nan ka 17 tahun....!

Padang, 12 September 2015.
Afma Tampan