Carito Lawak Minang: Gadang Sirawa

Carito Lawak Minang: Gadang Sirawa

Ilustrasi Gadang Sirawa

Namonyo Si Pudin, bantuak iyo ala kadar se, tapi parangainyo sabana ala kadabra, artinyo indak bisa ditakok doh, kadang elok, kadang jaek, kadang elok se jadi urang jaek.

Pudin ko tingga di Kampus, terkenal sebagai aktivis di Kampusnyo. Aktivis basorak-sorak hilia mudik di Kampuang suduik atau Kampus tu. Nan santiang inyo, nan bagak inyo, nan elok inyo lo, nan jaek inyo lo lik.

Patangko urang di kampuang kahilangan kambiang, dek santiang si Pudin ko dapek urang nan maliang tu dek e. Bukannyo kambiang tu dibalikan ka nan punyo, tapi kambiang tu di jua ka urang lain dek Pudin, nan maliang kambiang ko alah jadi kambiang hitam se.

Sapahik-pahik parangai si Pudin ko, tapi inyo sabana pa ibo pulo. Kalau inyo ibo ka urang, di pastikan sajo urang sakampuang  jaleh ka heboh. Ba a ka indak?, kapatang ko dek si Pudin ibo mancalik si Eti nan alah sapuluh hari ditinggaan laki e dek bakureh kalua kota, dek ibo mancalik si Eti sorang se kadinginan malam hari, Pudin ko mancubo mahibur jo mangawani eti ko. Untuang si Eti ko punyo harago diri, di ambik e palang pintu di hantamkan ka si Pudin ko, Pudin maluluang sambia lari,  Si Eti ko maharik lo ma imbau urang kampuang, " Maliang..... maliang........maliang". Mandanga rarau si Eti kalua urang sakampuang. Katiko ditanyo apo nan di ambik dek rang maliang tu, Eti manjawek jujur se, " Rencana urang maliang tu ka ambik punyo ambo nan ciek ko, untuang ambo lai sigap manjago e". kato Si Eti. Untuang si Pudin ko pakai sebo, jadi urang nan masuak ka kamar si Eti tu tatap jadi misteri.

Bisuk e di lapau kampuang suduik tu, carito urang heboh  tantang laki-laki dalang nan mancubo masuak ka kamar si Eti malam patang tu. Pudin nan sadang minum kopi di lapau tu sok-sok berang pulo ka laki-laki tu," Iyo sabana laki-laki indak ba utak, indak kambiang se nan di maliang e doh, kue sapik di maliang e juo. Kok basobok dek den urang maliang tu, den karek punyo e tu, den serahkan ka polisi sebagai barang bukti", kato Pudin jo gaya bantuak urang nan peduli bana.

Heboh urang dek galak mandanga kato si Pudin ko, andaikan sajo di nagari awak ko balakuu hukum bak kecek si Pudin tadi bahwasonyo satiok urang nan maliang kue sapik indak dihukum panjaro se doh, tapi alat bukti maliang kue sapik ko diambik dan di sita oleh negara, di pastikan sabana jaran urang maliang kue sapik ko isuk isuk e. 

Kok rarau jo gaham, iyo Pudin di ateh. Urang ancak pai lari sajo pado ba urusan jo Pudin ko. Pernah Pudin ko lego jo urang samo gadang, pacah badarah bibi e nan sambok tu kanai tinju. Urang nan maninju tu dilaporkan e ka polisi, Pudin baru amuh damai katiko urang tu mangganti biaya ubek sabanyak limo juta.

Pitih dapek limo juta, Pudin alah berpesta pora jo kawan-kawan e minum-minuman kareh. Satiok urang nan lewat nyo ambuihan angok e nan baun minuman kareh tu, alah mangompas urang pulo karajo e.

" Hoi... jan l;ewat se waang di siko...! lai tau waang si wak den...? ", kalau alah mangecek bantuak itu si Pudin, urang maklum se, dari pado kanai limo juta, bialah di agiah se pitih 50 ribu.

" Iyo din... iyo din, den tau sia waang", kato urang nan lewat sambia ma agih pitih 50 ribu.

" Itu namo e waang iyo tau sia wakden ko ". kato Pudin sambia mangipeh-ngipeh pitih tu.

Siang, tu,ado namo e si Amaik, inyo masih sakola kelas 6 SD,  Amaik ko sabana e urang kampuang sabalah, babako ka Kampuang Suduik. Dek taragak ka tampek bako, inyo bajalan sorang lewat di muko Pudin jo kawan-kawan e nan sadang mabuak tu. Langsuang se Si Amaik ko di harik dek Pudin.

" Hoi... paja ketek anyia......! ndak tau waang si den?", kecek si Pudin.

Dek Amaik ko, walau inyo ketek, tapi mantagi e sabana padek," Lai... uda urang tea.... karajo mabuak ka mabuak se... ndak malu uda samo kuciang bagai  doh", kato Amaik sabana enteang se.

Tabik berang si Pudin, langsuang se nyo sasau paja ketek ko. Rupo e Amaik ko pandeka pulo, dapek bana langkah silek Pauh dek inyo. Partamo Pudin malapak, inyo ma ilak, sudah tu katiko Pudin ka mandaram Amaik jo kaki gadang e tu, Amaik ko langsuang sigap manggeser langkahnyo dan langsuang kaki si Amaik tibo di karampang Pudin. Dek sakik indak tabado karampang e, Pudin maluluang ma imbau amak. Mandang luluangan Pudin dek kareh e amuh sampai ka sijunjuang, kawan-kawan Pudin tabang hambua kasado e.

" Amaaaaak....! ", rarau si Pudin. Katiko Amaik ka mandakek manyalasaian langkah duo e, Pudin  langsuang mambana mintak ampun, " Ampuuuuun.... alah mah... mambana den.... ampun, waang ndak paralu tau sia den doh, ampun... amaaaaaaak!".

Iyo sabana gadang sirawa Pudin ko, minta ampun mambana ka anak ketek. Tapaso malu jo sakik ditahan sorang dek Pudin, kok ka malapor ka polisi, tu di visum kaus lampu  e tu. kok tau lo polisi nan mandaram inyo hanyo anak ketek, kama malu ka disuruakannyo, sadang kini se kamaluan e alah sambok ma ijau dek di hantam si Amaik.....

Basambuang ka Episod: Lalok di Lua

Tonton juga ya youtub Tampan, Minang di:

Youtube   : https://www.youtube.com/channel/UCFOiFLcLUqKi2xdAnFb1qVw

Padang, 11 September 2015

Afma Tampan.