Sagantang Bagaluik Raso

sagantang bagaluik raso.....

dihari sahari nanko, dikana sado nan tibo. hujan paneh timpo batimpo. gamang jo rusuh basalimuik raso. alah dikakok sado karajo, alah dipatuik sado nan ado. samantangpun baitu, jikok basiang dinan tumbuh, manimbang dinan adoh, tumbuh sarupo iko kini. dek syariat ado bahakikat, lahia kulik mangandung isi, isi manjadi buah makna.......

dek enggeran sako nan tatagak, koto aman alam santoso, salamaik korong jo kampuang, ndak aman anak kamanakan, dunia bulih akhirat dapek, sinan merdeka makonyo panuh.....

satitik jadikan lawik, sakapa jadikan gunuang, sagantang nan indak amuh panuh, sapiku nan jadi baban.
sawah gadang satampang banih...
banamo sawah pancuang talang...
musim abih maso baralih......
iyo pangana ditanyo surang.

antah pabilo kamasonyo, hari direndo bulan dirajuik, namun tahun batambah juo...
awa dikana akhir dibaco, hati talendo badan tarajuk, namun jalan marambah juo....

tagak dilawik tak barombak...
tagak dipadang tak barangin....
tagak badan indak baranjak..
tagak hati antah balain....

sagantang bagaluik raso...
sapikua baban timpo batimpo....