Pudin Takaca Bencong

Pudin Takaca Bencong

Ilustrasi

 Dek lamo maso baputa, alam batambah tuo juo, bamacam ragam  kajadian nan nampak. Ado laki-laki jadi padusi, banyak pulo padusi bantuak laki-laki. Nan alun tajadi alah tajadi, dunia wale kecek rang kini.Tantang laki-laki jadi padusi, namonyo bencong kecek rang kini, bagincu taba pakai rok mini, suko bakaliaran dimalam hari, lenggak jo lenggok sabana seksi, karajo mamanciang birahi laki-laki.

Indak salah bungo lembayuang, bungo kajorat kambangnyo sore, indak salah bundo manganduang, salah  dek slogan programnyo kabe. Dulu KB mamakai slogan , " Duo anak cukup, laki perempuan sama saja".  Akibat program kabe nan manyampaikan laki padusi samo sajo mako banyaklah lahia bencong ka bumi ko. Akhirnyo kato-kato laki perempuan sama saja tu bahilangkan,  kini hanyo mamakai slogan  , " Ayo ikut KB, duo anak cukup".

Bagi si Pudin, nan alah babini jo si Lela sajak limo tahun nan lewat sampai kini alun juo dapek anak, Bukannyo Pudin ko ikuik program kabe, dan bukannyo inyo indak manalok, tapi mungkin dek pintak jo pinto nan alun takabua. Kok mancalik anak urang takana dek Pudin ko inyo alun baranak lai, tapi kok mancalik bini urang sabana lupo Pudin ko bahwasonyo inyo alah babini.

Katiko tu Pudin sadang mangopi di Kampus atau kampuang Suduik, di kadai kopi basamo kawannyo si Munap. Mancalik hiruik kopi sampai tadadak dek Pudin, batanyolah si Munap," Barek bana pikia waang den calik Din, lai ndak sadang galau waang kini ko", tanyo si Munap.

" Itulah Nap,  satiok den mancalik padusi, rancak se den calik....,  lai indak sakik mato wakden ko atau dek pangaruh kabuik barangkali ndak..?", jawek si Pudin.

Galak badarai Munap mandanga jawaban si Pudin, " ondeh Din...! waang indak tarubah-rubah juo, Kalau bantuak iko, indak panyakik nan ka mambunuh , tapi parangai waang sorang nan ka mambunuh diri waang ko...". kecek Munap.

Sadang asyik ma ota, tibo-tibo masuk sms ka hp si Pudin. Munap mancalik si Pudin tersenyum-senyum saja mambaco sms tu, " sanang hati waang mambaco sms tu mah din, SMS dari sia tu?", tanyo Munap penasaran.

" Waang ingin tau urusan seleb se mah, iko SMS dari kawan konser den", jawek Pudin kalamak isi paruik inyo se.

" Seleb..... salep kurok waang mah....! karajo ka ateh ka baruh se ma madekan jalan, sok konser gaya seleb lo.... waang uruslah urusan konser waang tu, wakden ka manyabik rumpuik untuk jawinar den ciek dulu", kato Munap alah muak mancalik lagak si Pudin sambia kalua dari lapau tu.

Katiko Munap alah kalua dari lapau tu, Pudin pun bergegas pula kalua lapau. Ruponyo SMS nan masuk tadi dari selingkuhan baru si Pudin nan di kenalnyo di fesbuk, ma ajak Pudin manonton di bioskop dakek jalan Dobi.

Satibo di Bioskop sasuai nan di janjikan dalam SMS, Pudin mancalik Padusi nan sabana seksi sadang duduk diruang tunggu bantuak manunggu seseorang. Hati Pudin badatak kancang, karano padusi nan dicaliknyo tu sasuai bana jo ciri-ciri nan disabuikan dalam SMS, barambuik sabahu, pakai baju warna merah jo sirawa levis ketat, sarato sipatu tinggi tumik, maklum sabalunnyo alun pernah basuo, hanyo komunikasi sms jo chatingan di fesbuk sajo.

Bantuak akting di sinetron, mukasuik ma agih suprise, Pudin mandakekan padusi tu dari balakang. Pudin dengan mesra manyapo padusi tu sambia manapuak lembut bahunyo sambia mangecek, " iko pasti si Tince ya....". kecek Pudin ba mesra-mesraan.

Si Tince ko indak mancalik ka balakang doh, tapi tangannyo bagarak pulo mamacik sarato ma elus tangan Pudin nan alah dibahunyo, " iyo.... iko Pasti uda Pudin....". baleh Tince ndak kalah mesra pulo.

Tasirok sanang darah Pudin, indak sio-sio ruponyo doh inyo ba abih pulsa chatingan jo SMS-an salamoko, karano padusi nan di angankannyo salamo ko bantuak bintang sinetron bana. Tapi suasana bahagia Pudin barubah manjadi bahagia tea katiko si Tince ko mambalikan badanyo. Wajah cantik si Tince ko jadi cacat di mato si Pudin katiko mancalik jakun-jakun si Tince naik turun.

Pudin sugiro sajo minta izin ka Tince jo alasan sasak ka wc, dan sugiro mahilang dalam pandangan si Tince......

Padang, 6 Oktober 2015
Afma Tampan