Pantun Pa Ubek Santuang Palalai

Pantun Pa Ubek Santuang Palalai

Ilustrasi Bujang Lapuk

Ka Surau awak ka Surau
baraja kaji sapatah duo
mararau awak mararau
nan dek urang tatap lalu juo

Dimalah kaji pagunonyo
untuk panguek paganta diri
dimalah pitih adonyo
asa lai dapek bia den cari

Kok sanang basirawa levis
dipakai dihari patang
kok urang dikaja pitih
nan awak dikaja hutang

Rancak baju di hari rayo
baju dibali ditanah abang
rancak awak di kaja jando
dari pado dikaja hutang

Diliek raso kadapek
dikaja raso kalari
dimalah badan indak ma upek
awak alah gadang alun babini

masak bana buah mangkudu
tinggi jo apo ka di jangkau
laruik bana badan marindu
siang malam hati marisau

kabau baranak jawi manyusu
kambiang kekah bajangguik panjang
sabana galau badan marindu
kasih di cinto ditangan urang

koncek sawah sadang baranang
tungau di badan manggigik kulik
urang alah marendo banang
awak masih mancari panjaik

dimalah sumu digali
disinan tumbuh si batang paku
dimalah amuh ka dapek bini
awak nio inyo indak satuju

tolong carian daun cubadak
untuk dibaka pa asok diri
santuang palalai bia ditolak
kok isuk lai ka dapek bini.....


Padang, 10 Oktober 2015
Afma Tampan