Pantun Mukadimah

Pantun Mukadimah

Afma Sasma Tampan Malin Marajo

Tagak di adat jo pusako
dek warih cupak jo gantang
dek luruih tujuan kato
dek alua manantang bana
sambah taserak ka nan rapek
salam kapado nan basamo

Assalamualaikum. ww


nak elok salendang bumi
nak ulam pucuak manjulai
nak aia pincuran tabik
nak cincin galang nan bulih
nak kilek cahayo tibo
kajadi saksi bungo jo daun
adat bajalan sandirinyo

alah basuluah matohari
bagalanggang mato rang banyak
dimalah alif ka badiri
adat nan jauh dari syarak

dima kain ka baju
diguntiang mako tak sadang
takanak mako di ungkai
dima nagari ka maju
adat pusako nan alah hilang
dahan jo rantiang nan bapakai

dilayangkan pandangan jauh
ditukikan pandangan dakek
hakikat kalam mancari suluah
pedoman hiduik di pacik arek

Buruang si nurak buruang si nuri
manari-nari ateh pamatang
musim baputa maso baganti
adat pusako jan sampai hilang

adat ampek nagari ampek
undang nan ampek  kito pakai
cupak jo gantang kok tak dapek
luhak nan tigo tabangkalai

dimalah sarik babungonyo
rumbio di rumpun talang
dimalah cadik pagunonyo
panampuh riak galombang

karih banamo si katimuno
pakirim rajo dari majapahit
cadik basabab bakarano
tuah batenggang di nan rumik

tagak dilawik tak barombak
tagak di padang tak barangin
sa iriang adat jo syarak
mako barasih lahi jo batin

tatungkuik jalan manurun
tatagak jalan mandaki
adat jo syarak kalau tasusun
bumi sanang padi manjadi


ka Tuhan tangan di tadahkan
mamintak pado Ilahi
manjunjuang kapado Rasul
pintak kok lai ka bulih
kandak kok lai kabalaku
kapado dunsanak pambaco blog ambo

ambo nan indak cadik pandai
ilmu di Tuhan tasimpannyo
kok di turuik gurulah mati
di calik surek alah hilang
senteang kato mintak dibilai
kurang pangana mintak ditukuk
disabuik sado nan dapek
nan elok dipacik arek
nan buruak dibuang jauh

dimano titik palito
dibalik telong nan batali
dimalah badan ko raso baguno
sado nan dapek cubo babagi

Tasabuik basa ampek balai
indomo di saruaso
hutang ameh di bayia lansai
hutang mukadimah lansai disiko

Wassalammualaikum. ww