Carito Lawak Minang: Ulah Manyabu

Carito Lawak Minang: Ulah Manyabu

Ilustrasi Manyabu

Indak panyakik nan manyeso, tapi parangai nan mambuek badan tabedo. Bak itu bana nan sadang tajadi pado diri Pudin nan keturunan Indo jerman tu alias amak e jando abak e preman tu. Sajak acok di suruh lalok di lua dek induk bareh e nan banamo Lela, Pudin ko alah banyak galau, lalok di surau, duduk di lapau, kok ado urang nan maliang Pudin ko nan ta imbau.

Galaunyo si Pudin tabaco dek si Kojek, Kojek ko adolah urang Kampuang Suduik nan baru pulang dari rantau. Diliek dari panampilan, si Kojek ko tamasuk urang nan sukses di rantau, abuk basikek, sipatu bakilek, salamo di kampuang karajo duduk mangamek, tiok sabanta muncuang tu bantuak urang mahiruik jo mangulek.

Katiko si Kojek mancalik si Pudin duduk tamanuang di muko rumah amak e nan jando tu, Kojek ko langsuang mancaliakan raso peduli e, " Din, gua lihat lu seperti banyak persoalan, santai aja coi...  dunia ini indah.... jangan hati di buat susah...... Nih lu coba hirup ini", kato Kojek sambia manyodorkan mainan nan biaso di pakainyo, bantuak e saroman lampu aladin, pakai pipet untuk di hiruik atau di hisok jo muncuang atau hiduang.

Dasar si Pudin, urang bengak nan ba utak di ampu kaki, ndak bisa mambedaan ma nan ameh ma nan perak, inyo sosoh se apo nan agihan dek Kojek tu..... Sakali duo kali hiruik, muko Pudin ko alah barubah, galak manih langsuang ta ukia di bibia nan sambok tu. Pudin sabana maraso bahagia tea bana, bahaso alah baganti jo bahaso betawi, saroman si Kojek mangecek. Ndeh... iyo sabana basobok kada jo kain buruak.... sasuai bana Kojek jo Pudin, samo galau jo sakau......

Si Kojek ko rupo e ndak pamakai se doh, bisa jadi pengedar nan sadang melebarkan sayoknyo. Soal-e katiko si Pudin alah dapek candu e, Kojek ndak amuh ma agih perai ka Pudin lai doh, " lu kalau butuh, jangan gratis melulu... beli dong. Kalau lu nggak ada duit, lu tolong jualin pada yang lain, ntar lu gua kasih ini barang gratis......", kecek Kojek ko Ka Pudin.

Apo aka lai..... awak butuh, tapi isi saku lusuh. Takana dek Pudin ko, bahwasonyo amak e pernah mangecek punyo pusako sabidang. " den umbuak amak den ko supayo inyo amuh manjua pusako tu", kato Pudin dalam hati e.

Katiko sampai dirumah, di calik e amak e tu sadang manjaik baju nan cabik katiak e, mangecek lah Pudin katiko tu," Mak.... dulu amak mangecek punyo pusako sabidang, kok amak lai sayang ka anak amak si Pudin nan tongga babeleang ko.... di jua pusako tu ba a agak hati mak?'. kato Pudin.

Mandanga kato Pudin nan bak kian, raso babunyi patuih tungga, tabik setan amak Pudin nan jando tu, " Apo kecek ang.......?   anak bincacak anak bincacau... anak si ngiang-ngiang rimbo....  ! pusako den nan sabidang ko nan ka waang jua.....? ka waang suruh den jadi lonte.....?  anak kalera..! barangkek ang kini ko juo?", kato amak Pudin sambia ma ambik golok mangaja anak e tu.

Pudin takajuik sarato lari tabik kantuik. Indak di sangko amak e sabana tabik rabo dek mandanga permintaan e tu....... Mukasuik Pudin tu manjua pusako nan dibalakang rumah, tapi ba a lai... Pudin alah salah paguik eh salah sabuik....

Basambuang ka Banak si Pudin....

Tonton juo yo sanak youtub Tampan Lawak  Minang
Youtube   : https://www.youtube.com/channel/UCFOiFLcLUqKi2xdAnFb1qVw


Padang, 16 September 2015
Afma Tampan