Carito Lawak Minang: Banak si Pudin

Carito Lawak Minang: Banak si Pudin

Ilustrasi Si Pudin

Sajak kanai berang dek Amak e, gara-gara Pudin ko salah sabuik manjua pusako amak nan sabidang tu, hari-hari Pudin ko alah tabik manuang sajo.

Siang tu, dikadai Uwo Incim, Si Pudin alah asyik ma ota jo kawan e nan banamo Munap.
" Sakik kapalo den Nap", kato Pudin mamulai ota.
" Tu ubek e... ANKADIN... waang cubolah supayo hilang sakik kapalao waang nan baguang tu", jawek Munap santai sambia mahiruk kopi satangah nan alah tadadak tu.
" Mukasuik ang, ANKADIN tu Antuakan Kadindiang...? iyo sabana tega waang ka den Nap", baleh si Pudin sambia manakan-nakan kapalo nan sakik tu.

Munap ko paliang suko bana mambuek Pudin ko tasama, supayo marabo bana si Pudin ko mako Munap mancaritoan tantang anak e nan pulang sakola, mangadu bahwaso e paruik anaknyo tu  sakik, kemudian di nasehatkan dek Munap sabab sakik paruik tu  karano paruik anak e tu dek acok kosong. Jadi Manuruik Munap mungkin kapalo Pudin acok sakik tu karano kapalo tu acok  kosong pulo.

Iyo Marabo Pudin mandanga ciloteh si Munap ko, " latakanlah kapalo den iyo kosong isi e, apo beda e jo kapalo waang, nan indak adoh banak tu...",  kecek Pudin tabik rarau e.

Mancalik si Pudin alah naik tensi e, Munap ko mancubo menetralisasi suasana mananangkan hati si Pudin ko, " sabana e din, nan indak adoh banak tu tukang dagiang kaliliang, katiko inyo manggaleh dagiang  sambia basorak-sorak dalam komplek perumahan, dek suaro e mamakakan talingo urang nan tingga di komplek tu dek tiok sabanta manyorakan dagiang...! dagiang ....!, mako mangeceklah salah seorang pahuni komplek tu. Hoi... tukang dagiang... mamakak se ..! indak ado banak...!. . Mandanga kecek urang komplek tu langsuang di jawek dek tukang dagiang ko,. Hari kini ndak ado banak do.. nan ado dagiang se nyo... dagiang...! dagiang...", caracau si Munap ka Pudin.

" antoklah waang lai... babanak atau indak babanak tasarah waang lah....  kini den cari ubek sakik kapalo ciek dulu...  waang bayia kopi den kini jo kapatang sakalian ya", kato Pudin ka Munap.

" Incim... minuman wak den hari kini jo kapatang Munap  mambayia...!" imbau Pudin ka Uwo Incim sambia kalua dari lapau tu.

Mancalik Pudin kalua lapau bagageh se, Munap tapaso maklum se lai" iyo sabana indak babanak Pudin ko", kato Munap dalam hati.


Padang, 18 September 2015

Afma Tampan