Naskah Randai:
           MITIGASI GAMPO

Dikarang dek : Afma Sasma Tampan Malin Marajo

PEMAIN               :

1.       MAIN PANTAN

2.        MANTIKO BUNGO

3.       PAREWA LAPA 1

4.       PAREWA LAPA 2

5.       PAREWA LAPA 3

6.       TUKANG UBEK TANGAH BALAI

7.       SUTAN RAJO GOMBAK

8.       PUTI ( ADIK MANTIKO BUNGO)

9.       MANDE MANTIKO NUNGO

10.   SUARA AYAH MANTIKO BUNGO

11.   SUARA 1

12.   SUARA 2

13.   SUARA 3

LEGARAN PEMBUKA :

Legaran 1:

( PEMBUKAAN MAIN PANTAN )

MANOLAH NINIK  NAN JO MAMAK

SARATO PANONTON NAN BUDIMAN

AMBUN JO MAAF KAMI MINTAK

RANDAI KINI KAMI MAINKAN

BANYAK CURITO NAN ALAH DIDANGA

BAMACAM KABA NAN  DISAMPAIKAN

DEK KAMI KETEK BARU BARAJA

SALAH JO JANGA MOHON DIMAAFKAN

SIKUJU JOLONG BADAUN

BALADANG ANAK KOTO TUO

KOK MUJUA SAPANJANG TAHUN

KOK MALANG SAKIJOK  MATO

NAK SAJUAK RASONYO KIRO KIRO

NAK  SANANG RASONYA DALAM HATI

IKO CARITO TANTANG MITIGASI GAMPO

MARI DISIMAK JO SUKO HATI……..

LEGARAN 2:

( MANTIKO BUNGO SEDANG BERJALAN MENUJU PASAR/ BALAI/ PAKAN  HENDAK MENJUAL HASIL LADANGNYO YANG DIBUNGKUS  DENGAN KAIN SARUNG.  MANTIKO BUNGO BERJALAN DENGAN TENANG SAMBIL MENYANDANG BUNGKUSANNYA. DITENGAH PERJALANAN DIA DIHADANG OLEH TIGA ORANG PAREWA) .

PAREWA LAPA 1:

MANOLAH BUYUANG  NAN BARU GADANG

JALAN BAGAGEH BASORANG DIRI

APO BANA NAN BUYUANG SANDANG

TOLONG JAWEKLAH TANYO KAMI….

PAREWA LAPA 2:

HOI BUYUANG…..!

BATARATIK WAANG SAKETEK…..!

KETUA KAMI BATANYO WAANG ANGGAP ANGIN LALU SAJO…!

PAREWA LAPA 3 :

( MA HAMBEK JALAN MANTIKO BUNGO)

MANTIKO BUNGO:

MANOLAH MAMAK NAN BATIGO

AGIH LALU AMBO BAJALAN

AMBO INDAK INGIN BASANGKETO

HANDAK BASUGIRO SAMPAI DI PAKAN…

PAREWA LAPA 2:

HAHAHAHAHA…

KAMI BATIGO WAANG IMBAU MAMAK…..HAHAHA

HAROK WAANG YO … PUSAKO KAMI TURUN KA WAANG… HAHAHA

SUGIRO WAANG AGIHAN BUNGKUSAN ITU KA KAMI…..!

KALAU INDAK…….

PAREWA LAPA 3:

DA DA DA DARRRRRAAAAM SE LA LA LAI…..

MANTIKO BUNGO:

ALAH BASULUH MATOHARI

BAGALANGGANG MATO AMBO SURANG

JALEH BANA MUKASUIK HATI

RUPONYO MAMAK TUKANG MINTAK MINTAK…….

DICALIK RUPO SABANA HAROK

TULANG KUEK BADAN BADAGOK

NYATO PARANGAI  SABANA JAJOK

SUKO MARAMPEH JO MARAMPOK……

PAREWA LAPA 1:

ANAK BINCACAK ANAK BINCACAU

SI NGIANG NGIANG DIDALAM RIMBO

USAH WAANG BANYAK CIRACAU…..

AGIHAN BUNGKUSAN WAANG TU SUGIRO…..

PAREWA LAPA 3:

DA DAD DA DARRRRRRAM  KE KE TU TU TU A……

( TERJADI PERKELAHIAN, MANTIKO BUNGO DENGAN MUDAH MENGALAHKAN PAREWA NAN BATIGO)

PAREWA 1.2 .3 :

AMPUN RANG MUDO…….

MANTIKO BUNGO:

MANOLAH MAMAK NAN BATIGO

USAH KARAJO RAMPEH JO RAMPOK

WALAU HIDUIK BANYAK SANSASRO

CARILAH RASAKI NAN ELOK ELOK

BANYAK BANCANO NAN ALAH TAJADI

PERINGATAN DARI NAN KUASO

BANYAK BANYAKLAH MANGANA DIRI

USAH NAFASU DIJADIKAN RAJO….

Legaran 3

( DITANGAH BALAI,  TUKANG OBAT TANGAH BALAI MEMPERSILAHKAN JURU PANARANGAN NAGARI UNTUK MENYAMPAIKAN PESAN ANGKU DAMANG)

TUKANG OBAT:

MANOLAH DUNSANAK AMBO KASADONYONYO

SABALUN UBEK AMBO BAGIKAN

UBEK SAKIK NGILU JO PANIANG

UBEK GATA BIRIANG JO  KUROK

ADO SAKETEK BARUPO PASAN

UNTUK MASYARAKAT SAKALILIANG

MARI KITO SIMAK ELOK ELOK

MANOLAH JURU PANARANGAN NAGARI

NAN BANAMO SUTAN  RAJO BAGOMBAK

SAMPAIKANLAH PASAN KINI KINI

 BAGUNO UNTUK RANG BANYAK

SUTAN RAJO BAGOMBAK:

MANOLAH DUNSANAK KASADONYO

IKO KABA UNTUK DIKABAKAN

DEK NAGARI KITO ACOK DI HOYAK GAMPO

JAN SAMPAI AWAK MANJADI KORBAN

KOK MALATUIH GUNUNG  BARAPI

BUMI BAGONCANG GAMPO TAJADI

GAMPO VULKANIK KECEK RANG KINI

SUGIRO KITO MANYALAMATKAN DIRI

KALAU BAGESEK LAPISAN BUMI

LAPISAN PATAH BUMI BAGONJANG

ITU BANAMO GEMPA TEKTONIK

GAMPO MUNGKIN ADO TSUNAMI

USAH  SANAK MAMANG JO BIMBANG

SELAMATKAN DIRI NDAK USAH PANIK…..

GAMPO DATANG AYIA LAWIK SUSUIK

IKAN DILAWIK BAGALIMPANGAN

TANDO TSUNAMI KA DATANG MALANDO

IKAN NAMPAK USAH DIPUNGUIK

INGEK GALOMBANG GADANG NAN  KA DATANG

KALAU NDAK INGIN BADAN CILAKO

KOK HATI BAKATO KATO

DEK KARAJO NAN ALUN SUDAH

ELOK DIKAMEH SADO NAN TINGGA

GUNUANG DIKAJA INDAK KALARI…..

KOK NAGARI DI HOYAK GAMPO

CAPEK KALUA DARI RUMAH

USAH DIPIKIAN HARATO NAN TINGGA

SELAMATKAN DIRI KATAMPEK NAN TINGGI….

LEGARAN 4:

( DIRUMAH ORANG TUA MANTIKO BUNGO. BUMI BERGEMURUH DAN BERGONCANG. TERDENGAR TERIAKAN GEMPA).

SUARA 1:

GAMPO………….

SUARA 2:

GAMPOOOOO….!

CAPEK KALUA DARI RUMAH……

SUARA 3 :

GAMPOOOOOO………

LARI KATAMPEK NAN TINGGI…….

( MANDE  JO MANTIKO BUNGO MASUK LEGARAN BERGEGAS GEGAS )

MADE MANTIKO BUNGO:

ANAK DENAI MANTIKO BUNGO….!

MANOLAH ADIK JO BAPAK  WAANG…

KALAU TAKALOK SURUHLAH JAGO..

BUMI BAGUNCANG DEK ULAH GAMPO……

MANTIKO BUNGO :

AYAH…..   !

PUTI……….!

( MANTIKO BUNGO KELUAR LEGARAN MENJEPUT PUTI DAN AYAHNYA UNTUK SEGERA KELUAR RUMAH, HANYA PUTI DAN MANTIKO BUNGO YANG KELUAR, SEDANGKAN SI AYAH TETAP DIDALAM RUMAH KARNA BELUM MENEMUKAN PIPA GADING  PENGISAP ROKOKNYA)

MANTIKO BUNGO:

AYAH…… CAPEKLAH KALUA RUMAH……..!

SUARO AYAH:

SABANTA……  PIPA GADIANG PAISOK ROKOK DEN TINGGA…. WAKDEN MASIH MANCARI ANTAH DIMA LATAKNYO …. ……!

MANDE:

ONDEH UDO CAHNYO DENAI……..

CAPEKLAH UDO KALUA  RUMAH

GAMPO GADANG SADANG TAJADI

USAH DICARI APO NAN TINGGA …..

MANTIKO BUNGO:

AYAH…….

GAMPO GADANG SADANG TAJADI

MUNGKIN GAMPO ADO TSUNAMI

ELOK KITO SELAMATKAN DIRI

SUGIRO LARI KATAMPEK NAN TINGGI……….

( TERDENGAR SUARA GEMURUH KERAS, BUMI BERGONCANG SEMAKIN KUAT DAN RUMAH MANTIKO BUNGO ROBOH OLEH GEMPA)

PUTI, MANTIKO BUNGO:

AYAAAAAAAH…………….!

MANDE:

UDO….. ( DENGAN SUARA TERTAHAN DAN TERISAK )

MANTIIKO BUNGO:

MANDE……

INDAK AJA BAPANTANG MATI

KITO MANYARAH PADO NAN KUASO

SUGIRO KITO KATAMPEK NAN TINGGI

SABALUN TSUNAMI DATANG MALANDO PULO……

LEGARAN PENUTUP

Padang, 2017.