Carito Lawak Minang: Curhat Sedih Si Pudin

Carito Lawak Minang: Curhat Sedih Si Pudin

Ilustrasi

Siang tu si Pudin alah marakuk bantuak ayam kanai akuk, sagaleh kopi jo kue mangkuk nan mangawani si Pudin dilapau Uwo Incim nan sadang duduk. Dek angan lalu paham tatumbuk indak basalero maminum kopi jo mangudok kue mangkuk, pikiran Pudin  sadang mabuk bana karano alah saminggu urang rumahnyo lalok mancangkiluk, sebagai protes pado Pudin gara-gara tiok bulan pitih pambali bareh ndak pernah cukuik.

" Muak den mancalik muko waang nan takah iko, bantuak baruak gadang alah pensiun. Waang minumlah kopi tu, supayo tabukak pangana elok saketek...!", harik si Munap nan baru datang di kadai Uwo Incim. " Wooo..., tolong kopi satangah galeh, agih gulo saketek, ndak usah pakai tadah, sendok pangacau e jan lupo, untuk pangacau pangana Pudin nan acok eror sakalian..!".

" Untuang waang tibo Nap, wakden ingin curhat jo waang", kato Pudin mancalik Munap alah duduk dilapau tu.

" Tanyato Nap, akad nikah labih babahayo dari akad kredit, kalau akad kredit siap di tando tangani, tiok bulan awak wajib manyetor  sampai dalam jangka waktu tatantu. Tapi kalau akad nikah alah ditanda tangani,  awak wajib manyetor sampai angok dikanduang badan. Kalau indak talok manyetor lai, awak bantuak ba urusan se jo debt collector.....",  tutur si Pudin ka Munap.

Mandanga kato Pudin nan bak kian, tabik galak gadang si Munap, " hahahahhaa... waang mangecek bantuak urang dek sawan se Din.....  dima pulo akad nikah jo akad kredit samo....? akad nikah tangguang jawab lahia batin, akad kredit tangguang jawab hutang...! Makonyo kalau indak talok ma agih nafkah anak urang lahia batin usah waang babini..... lai tau waang babini tu babani, barek jo ringan baban tu harus di pikul.....!", jawek Munap sambia manahan sakik paruik mandanga curhat si Pudin.

"Wakden ado carito tantang debt collecftor Din.." , sambuang Munap.
"katiko den jadi deebt collector, satibo dirumah nan dituju, rumahnyo bakunci pintunyo, dimuko rumah tu hanyo ado anjiang panjagonyo.

Den tanyo se ka anjiang tu, " lai ado bapak?", dijawek jo anjiang tu " waw.... waw.....". Dek anjiang tu manggugu duo kali mungkin artinyo indak adoh dirumah doh


Den tanyo lo " ibuk lai ado?",  dijawek lo dek anjiang tu " waw.. waw."  Mungkin arti e ibuk e indak adoh lo dirumah

Katiko den tanyo " bapak jo ibuk  sadang manga?"
Di jawek lo dek anjiang tu, " oh oh oh oh...." .  Tabukak coki e, tanyato urang nan sadang dicari lai adoh dirumah sadang oh oh oh oh....

" Kaleraaaa...! apo carito waang ko ? Lah jaleh den sadang galau dan ingin curhat jo waang, tapi carito waang tu manyuruh den curhat oh oh oh jo urang rumah den.... Waang salasaikan kopi jo kue mangkuk den tu.... bia den pulang curhat oh oh oh se jo urang rumah den", Kato Pudin sambia manyalosoh se takaja kalua lapau Uwo Incim.