Tasarah nan di Ateh

Tasarah nan di Ateh

Ilustrasi tasarah nan di ateh

Katiko Pudin baru sampai dirumah, langsuang sajo amak Pudin maimbau anaknyo nan acok galau ko," Din.. dari mano waang? karajo hilia mudik mamadek jalan bantuak masin giliang sajo?", tanyo amak Pudin agak mambangih.

" Bialah Pudin duduk dulu mak, kan amak juo nan mangecekan, batanyo lapeh arak barundiang siap makan. bialah pudin lapehan litak-litak ko dulu, tu Pudin bia makan agak sapiriang duo piriang, sudah tu amak tanyolah Pudin sapasai-pasainyo", kecek Pudin ka amaknyo. Tanyato kalau kakawan samo gadang Pudin ko mangecek ba aden aden, tapi kalau ka amaknyo basabuik namo inyo. Iyo  santiang lo sopan sopian  koncek sawah nan sorang ko.

" Waang kalau ka makan kancang, kalau karajo mahilang. makanlah waang dulu, siap makan jan lupo waang basuh piriang sakali". kato amaknyo

Pudin ko kalau makan dirumah indak pernah banyak kandak, apo sajo nan dimasak dek amaknyo lamak se rasonyo. walau ba samba lado uwok patai jo abuih pucuk parancih sajo.

Iyo lapa rupo e baruak gadang ko, makannyo hanyo sapiriang tapi tambuhnyo tigo piriang.  Mancalik Pudin alah salasai makan jo mambasuh piriang makannyo, amak si Pudin ko langsuang malapehan uneg-unegnyo mancalik parangai anaknyo salamoko" Din, waang amak calik bantuak rumah gadang mahadok ka hilia, makin gadang makin pandia. Alun lapeh utang baralek kapatang lai doh, kini waang alah pisah ranjang, indak pulang-pulang karumah bini waang si lela lai doh. Kama pai utak waang tu, waang laki-laki, amak waang ko padusi. taulah jo untuang waang tu, cando apo juo bini nan katuju dek waang lai.....?  kalau waang ado persoalan jo Lela, mangecek elok-elok, indak ba antok-antok cando iko do. cukuik amak sakali ko mangecek jo waang. Kalau waang indak pulang juo karuimah Si Lela, waang indak bulih pulang karumah iko lai doh.....!", kato amak Pudin ko ma aja anaknyo.

Pudin tapurangah mandanga kecek amaknyo, sakali ko inyo mancalik amaknyo berang cando itu ma aja. Pudin ingin manjawek tapi dilarang dek amaknyo, " Usah waang bajawek kato jo amak waang ko, waang jawek tanyo amak jo perbuatan, bukan jo kato-kato waang nan suko bakelok lidah tu".

Sabana galau hati Pudin. Takana dek Pudin kato-kato bininyo si Lela, " kalau uda indak barubah juo, bajudi jo main-main padusi, indak usah uda pulang karumah Lela. Kok pitih bisa dicari, nan Lela butuhan dari uda perhatian jo kasih sayang uda, tapi untuk bali bareh uda ndak adoh pitih, untuk bahampok jo ba cewek-cewek uda indak pernah kakurangan pitih, iyo Lela ndak bisa tarimo doh da. Lela indak ma usi uda doh, Lela hanyo mangatoan pailah uda kamano uda suko untuk mancari pangana , kok alah barubah baliklah ka Lela, Lela akan saba manunggu uda baruibah..". Tabik manuang Pudin ko mangana kato bininyo. Sabananyo Pudin ko ingin barubah, tapi satiok ingin barubah adoh sajo godaan nan indak bisa dilawannyo. Contohnyo kapatang ko Pudin ko indak ka bacewek-cewek lai, tapi katiko mancalik sanggua nan agak licin pangana baruk gadangko langsuang sajo barubah. Inyo indak paduli doh apo padusi tu alah balaki atau alun, asa amuh pai langsuang jadi.

Bajalanlah Pudin ko mahilangan galaunyo, Pudin ko kalau sadang galau bana ubeknyo ciek sajo, yaitu minum ayia karambia mudo. Itulah sababnyo langkah kaki Pudin ko mambaonyo ka parak karambia, dalam parak tu sabananyo banyak tanaman lain nan tumbuh, tapi nan banyak tumbuh iyo batang karambi, adoh nan tinggi jo randah batangnyo. Mato Pudin tatuju ka batang karambia nan randah nan sadang babuah labek di parak tu, indak manunggu lamo langsuang se di panjek karambia tu dek Pudin ko.

Katiko Pudin alah tibo di puncak ka mamilih karambia mudo nan ka diturunkan, tibo-tibo datang katampek tu sapasang anak mudo nan sadang bapole-pole, urang nan sadang bapole atau ba pacaran ko langsuang sajo duduk baduo dibawah batang karambia nan sadang di panjek si Pudin.

Manciraguik Pudin mancalik kemesraan urang nan sadang pacaran tu, dari ateh batang karambia tu Pudin mancigok jo manyimak kurenah anak mudo nan sadang bamesraan tu.

" Picayolah dik, uda sabana balambin love ka adik surang, baribu bintang dilangik, hanya satu yang bercaya, beribu cewek nan cantik, hanya adik nan uda cinta", kato laki-laki tu ka pacarnyo. Marumeh paruik Pudin mandanga gombal ula gadang dibawah batang karambia tu.

" uda gombal......  kok iyo uda cinto jo adik.... manga hp uda indak bulih dicalik, sia nan manalepon uda, sia nan ma sms uda. Lai sabana batanguang jawab uda jo kato-kato uda cinto ka adik...?",. baleh ceweknyo marajuk.

" Dik...  bumi nan bakabuik ko jadi saksi bahwa uda sabana cinto ka adik. picayolah jo uda, uda batangguang jawab jo kato-kato uda. Kok adik tatap indak picayo juo ka uda... tasarah nan di ateh se lah lai...".

Mandanga kato laki-laki tu manyabuik tasarah nan diateh, tabik suga si Pudin ko, inyo nan bacewek jo padusi tu maso tangguang jawab di serahkan ka Pudin nan sadang di ateh batang karambia tu, " hoi..... ula gadang, waang jago muncuang waang nan balunau tu, kurang aja waang...! waang nan bacewek manga tangguang jawab basarahkan ka wakden...!", kato Pudin tabik berang sambia ma hambua dari ateh batang kuranjni ka bawah.

Arik si Pudin sambia ma hambau  kabawah tu mambuek laki jo padusi nan sadang bapole tu jadi takajuik sarato takuik, disangko Pudin ko hantu aru aru disiang hari, spontan urang baduo tu lari pontang pantiang bantuak dikaja anjiang.......

Padang, 21 Oktober 2015

Afma Tampan