Bela Membela

 Bela Membela

Ilustrasi bela membela

"Manuruik den Nap, masalah negara awak kini ko nan paliang barek adolah masalah ekonomi. Cubo waang pikia, urang mancopet, maliang jo marampok sampai sampai mambunuh dek ulah indak bapitih. Padusi jadi lonte jo laki-laki jadi gigolo dek ulah ekonomi juo. Urang manipu manepong  gara-gara ekonomi pulo. Jadi kalau manuruik den gara-gara pitih susah mako banyak urang nan malakukan sagalo caro, ndak penting halal jo haram, asa tarabai hantam. Makonyo nan harus dibela dek negara kiniko adolah urang nan lamah sacaro ekonomi ko....", kecek si Pudin ka Munap nan sadang duduk mangopi di lapau Kutar.

" Ndehhhh...  bantuak pangamat basikola tinggi gaya mangecek waang kini mah Din..., lai indak sadang tasapo hantu kuburan urang politik waang kini ko...?", jawek Munap taheran-heran jo gaya mangecek Pudin.

" Munap,,, Munap, walau awak urang lokal, tapi awak harus bapikia global. Cubo waang pikia...! kecek pamerintah nan awak danga di media, rakyat ko harus ikuik program bela negara supayo raso nasionalisme ko hiduik di satiok hati rakyat Indonesiako. Mental rakyat Indonesiako harus samo jo mental ABRI... harus masuk barak pulo. Kalau awak alah pulang dari barak.... apo ekonomi awak bisa pulih balik?. Kok salamo di barak tu awak dilatih ba a caro mancari pitih sacaro mudah ndak ba a doh, atau siap latihan tu awak di gaji bantuak tantara tiok bulan lebih rancak mah, tapi kalau ekonomi susah juo ba a awak ka mambela negara? membela ekonomi atau memperjuangkan hiduik se mancari apo nan ka dimakan pagi jo patang baralah ka susah e...?", lanjut Munap agak emosional.

" Waang sumbarang mangecek se Din, pangana waang tu pitih ka pitih se, iyo sabana indak punyo raso nasionalisme saketek juo doh, Indak punyo raso cinta tanah air NKRI waang doh, rancak waang angkek kaki dari Indonesia ko", jawek Munap mulai muak mandanga ocehan Pudin.

" Apo... Cinto Tanah Air kecek ang Nap?.   Walau tanah den sewa, Ayia den bali tapi wakden tatap cinta tanah air ko, walau hiduik den susah tiok hari.  Manuruik pandapek den Nap, kalau hanyo untuk meningkatkan raso nasionalisme, kan bisa dibuek kurikulum khusus, dijadikan mato pelajaran mulai dari TK sampai ka Perguruan tinggi. Untuk apo mambuang pitih negara manyadioan anggaran pelatihan  bela negara sampai ratusan triliyun. Rancak pitih tu digunoan untuk mambangun sarana jo prasarana untuk mamacu percepatan ekonomi di negara awak ko, atau dibuek pabrik nan bisa menyerap tanago karajo nan manganggur bantuak wak den ko", kato Pudin manjalehan saroman pengamat bela negara dadakan.

" Alah mah Din.. muak den mandanga kecek waang tu, jaan ka wakden waang mangecek saroman tu, pai waang ka studio radio atau tivi atau ka kantua redaksi koran, di sinan waang mangecek saroman tu. Muncuang waang  babusa-busa mangecek tinggi jo den, tapi kopi awaang wakden juo nan mambalian", jawek Munap alah sampai di puncak muak mandanga ocehan Pudin.

Mandanga kecek Munap nan bak kian, jadi pudua sumangat Pudin. Si Kutar nan dari tadi mandanga ocehan urang nan baduo tu sato lo manyorong membela si Pudin," Din.... ambo setuju jo kecek waang tu.... sanang ambo mandanga apo nan waang ocehan tu. Taruihlah mangecek Din, kok masalah minum kopi waang salomo saminggu ambo peraian di lapau ko. Jarang-jarang lo ambo mandanga urang nan kritis bantuak waang di kampuang suduik ko, antah waang tasapo dek hantu urang politik antah tido, nan jaleh ambo sapandapek jo waang. Kalau kebutuhan hiduik awak ko cukuik otomatis awak alah membela negara ko. Ba a awak ka mambela negara jiko nan dimakan pagi jo patang sabana centang parenang tulang nan lapan karek ko mancarian".

Mandanga kecek Kutar nan punyo lapau tu, tabik pangana Pudin mangecek balik," Bana mak Kutar....  tando e mak Kutar lai tinggi antene mah, samolo tinggi e jo antene radio sushi fm, radio urang padang tu. Saat kini ko harus e negara nan mambela awak nan indak mampu ko. Salagi awak hiduik di jalan nan bana arti e awak alah mambela negara. nan indak membela negara tu adolah urang nan malawan hukum negara ko, tamasuk kuruptor nan malantakan pitih negara ko".

" manuruik den Din, kiniko banyak urang nan bela, kecek e cadik tapi sabana e bela. carito satinggi langik tapi hiduik maringik. Tungau di subarang nampak tapi gajah di palupuk mato indak nampak", solo Munap manyindia Pudin.

" Nap, wak den cando iko dek karano tido.Wak den tau arah kecek waang tu manyindia den. Kecek guru den, jaan dibiasoan manilai kato-kato dari sia nan mangatoan, tapi biasoanlah manilai kato-kato dari apo nan dikatoan. Kalau kecek den bana pahami sajo. Mantang-mantang wak den urang susah makonyo kato den salah sadonyo?. waang sangko urang-urang politik nan hebat tu kato e bana sadonyo. Untuk waang ketahui Nap, banyak urang mangecek mengatas-namakan rakyat, tapi wujuik dari parangainyo untuk kepentingan inyo jo kelompoknyo,". Jawek Pudin sabana bapaham.

Tapurangah  si Kutar nan punyo lapau mandanga kecek Pudin ko. Indak disangko Pudin nan salamoko jadi biang sagalo biang dikampung suduik tu sabana dalam filosofi keceknyo. Si Munap nan tau bana isi banak si Pudin mulai ma angguk-angguk pulo." kalau bulih awak samo-samo jujur, awak ko sadonyo alah samo-samo bela, cubolah pikia, awak hiduik dinegara kayo tapi kenyatoannyo awak hiduk miskin. tiok pilkada awak amuh bacakak-cakak mandukuang urang nan kajadi pemimpin. inyo duduk ekonomi awak tatap tapuruak, janji tingga janji, tiok hari awak tatap juo makan pucuak kaladi", lanjuik si Pudin saroman urang curhat sajo.

Dek asyik ma ota, indak taraso se hari alah jam limo sore,  tibo-tibo hape si Pudin mandariang. Rupo e ado nan masuk sms ka hape si Pudin ko, Hati Pudin girang kapalang indak tabado katiko mambaco sms tu," Mak kutar, tadi amak manjanjian minum kopi ambo perai saminggu di lapau ko. Tapi kini ambo manjanjian pulo, minum kopi jo balanjo kawan ambo salamo sabulan di lapau ko ambo nan manangguang, catat yo mak....". kato Pudin sambia kalua dari lapau si Kutar.

Ruponyo Pudin ko manang angko togel singapur ampek angko sabanyak duo puluh ribu pasangan.
Tanyato Pudin salamoko rajin mambela cino singapur jo hongkong maramaikan dunia buntuik.

Padang 16 Oktober 2015

Afma Tampan