Kaba: Misteri Sugi baracun

Kaba: Misteri  Sugi baracun

Ilustrasi Sugi Baracun

Tibo dilangik jadi berita, tibo di fesbuk jadi kaba. Alkisah di zaman mancik manangkok kuciang, di sebuah pemukiman nan banamo kampuang Kapindiang.

Alah manjadi buah bibia didalam kampuang dan manjadi buah-buahan didalam parak. Kaba tantang Sugi Baracun nan alah mambuek banyak laki-laki  mati tagalatak. Suok kida bisiak alah kadangaran, muko balakang kaba alah bahamburan. Bakapesong manti jo polisi, sagalo urang alah ditanyo, sagalao saksi bahimbau pulo, namun sia garan nan punyo sugi, nan mambuek banyak laki-laki  mati, sampai kini alun juo taciumi.

Bamusyawarah urang gadang nagari, dikumpuan sagalo nan santiang, manarawang usut asa kajadian, namun sugi baracun tatap jadi misteri.

Dek lamo bana mancari, angan lalu paham tatumbuk, rumah tampak jalan ndak tahu, lamo bajalan taraso panek, lamo bapikia taraso sandek.

Dialih kaba sabanta, namun baralih disinan juo.
Tasabuik Uwo Saima, nan tingga di tapi banda, dakek bukik hantu tungga dalam nagari Kapindiang Bala. Konon kaba nan didanga, tantang garan Uwo Saima, umua baru saratuih tahun, namun kulik alun kandua, kok duduak alun maunjua, matonyo bapantang kabua, Sabana ditakuikan dek hantu kubua.

Uwo Saima urang kiramaik, punyo alimu lahia jo batin, alun takilek alah takalam, kalam Allah kalam Muhammad, namun mukrifat disinan juo.

Tantang saktinyo Uwo Saima, tadanga kaba dek Kapalo Banda, nan kini ka maju di PILKADA. Kaba nan didanga dek Kapalo Banda, Uwo Saima ba alimu tarawang Dewa, bisa manyilau nan alah jauh, dapek mancalik nan kadatang.

Urang Padang mamuta banang, banang diputa di parampek, ndak elok dirantang panjang, kaba diputa di pasingkek.

Tibo Kapalo Banda di pondok Uwo Saima, disampaikan mukasuik jo tujuan, bia manyatu jin jo setan, asa lai dapek nan jadi tujuan.

Kok dapek pintak jo pinto,  bukan Pinto Janir mukasuik ambo, mintak tolong Kapalo Banda jo Uwo Saima, gunokan sagalo ilmu nan ado, jadikan inyo tapilih di Pilkada 

Mandanga kato Kapalo Banda, sinan mangecek Uwo Saima," ondeh tuan kapalo banda, mamintak kapalo Allah, Manjunjuang kapado rasul, mintak lai kabulih, kandak Tuhan magkadimkan. Danga dek tuan kapalo banda:

Sirawik bari bahulu
lah tajam mako bamato
babuek tuan dahulu
baru nyato sabalun nyato

dima sarik babungonyo
dirumbio rumpun talang
dima cadik pagunonyo
jan mudah dikicuh urang

tanamlah sirih tanamlah pinang
tanam karakok tangah halaman
tanamlah jariah usah digantang
harok urang mamilih tuan".

Mandanga kato nan bak kian, Kapalo Banda raso kanai piganta, dek kandak indak dilaluan, hati berang indak tabedo, namun galak dicalikakn juo. Basugiro kapalo Banda, mintak izin ka Uwo Saima, barangkek kutiko itu juo. 

Di alih kaba sabanta, namun baralih disinan juo, kaba tantang Sugi Baracun, nan bakuliliang mancari mangsa. 

Dek garik kuaso kito, nan garak kuaso Tuhan, tibo pado suatu maso, katiko matohari di ateh kapalo.
Hari angek bukan kapalang, Sugi Baracun batamu pandang, jo Kapalo banda si urang gadang. 
Dek condong salero ka nan lamak, condong mato ka nan rancak, hati Kapalo Banda badatak-datak, mancalik Sugi baracun sabana rancak.

Dek pitih banyak di uncang, dek ameh salilik pinggang, Kapalo Banda lah tabik dalang, Sugi Baracun di rayu surang, di ajak indehoi ka hotel babintang. 

Pucuk dicinto bulan nan tibo, sumua digali aia datang, cincin dimintak galang nan bulih, Sugi Baracun bahati sanang, karano mangsonyo nan datang surang. 

Dihari sahari nantu, di kamar hotel babintang, masuk malam kalua siang, Sugi Baracun langsuang mahilang, maninggaan Kapalo Banda nan lalok talantang, badan dingin tubuhlah tagang, karano angok alah pai hilang.

Urang heboh bukan kepalang, di media dibuek berita gadang-gadang, tantang Kapalo Banda nan alah bapulang, mati tagalatk di kamar hotel babintang. Di usuik pagi jo patang, sia bana nan jadi dalang. Dikumpuan bukti jo saksi, petunjuk hanyo sebuah sugi, sampai kini tatap jadi misteri........
the end.....

Untuk galak tasengeang atau bagalak-galak caro awak, tonton juo video dibawah nanko:
Youtube   : https://www.youtube.com/channel/UCFOiFLcLUqKi2xdAnFb1qVw 

Padang, 10 September 2015
Afma Tampan