Kaba: Gampo Dalam Pantun

Kaba: Gampo Dalam Pantun

 

Ilustrasi Gampo

banyak kaba nan didanga

indak tadanga kabanyo gampo

dek takuik maleh mangana

warisan putuih badan sangsaro...

ado gampo nan dari darek
dari lawik lebih bahayo
bumi baroyak badan mangaretek
tsunami datang malendo pulo

alah babilang baratuih taun
carito putuih indak takaba
elok balik kito manyusun
jan sansaro batambah bana

musim habih maso babilang
kabau bamanuang dihari sanjo
gampo gadang iyo kadatang
elok kito siap sadio...

sicerek dakek pamatang
rumpuik sawik manjelo jelo
dari ketek sampai nan gadang
pahami bana carito nanko

alun takilek alah takalam
bulan nan langkok tigo puluh
paham singkek aka tabanam
disinan nagari makonyo luluh

hari malam nan malaruikan
disian badan makonyo rusuh
aia tanang nan mahanyuikan
usah sanak sampai takicuh........

ingek bulan tarang purnama
kana bulan nan baru tabik
disiko kito mamulai kaba
kaba nan turun dari langik

pulau paco pulau andaleh
ombak badabua mamacah karang
gampo tibo usahlah cameh
iman didado usah baguncang

kok takuik dilamun ombak
usah barumah ditapi pantai
tagak dilawik tak barombak
sabalun pintak alun bacarai..

rancak nagari mandiangin
kelok baliku lubuk salasih
tagak dipadang tak barangin
badan jo nyawo indak basisih

dari bunguih ka pasia jambak
anak nelayan mandayuang sampan
bumi padang biaso baroyak
jo gampo kito harus bakawan

sirawik bari bahulu
lah tajam mako bamato
alam takambang jadi guru
bumi mandaram alah biaso

tahun tujuh baleh  sambilan tujuh
ingeris bakuaso di padang nanko

bumi padang jadi gamuruh
gampo jo tsunami datang malando 

tahun lapan baleh tigo puluh tigo
padang di parintah urang balando
bumi baroyak lawik manggilo
padang kumbali ditimpo bancano

banyak kaba nan didanga

indak tadanga kabanyo gampo

dek takuik maleh mangana

warisan putuih badan sangsaro...

September duo ribu sambilan
tanggal tigo puluh dihari sanjo
padang dihoyak jo pariaman
gaduang jo rumah dirubuhkannyo

banyak urang nan jadi korban
gampo datang awaklah panik
takana harato nan disalamaikan
banyaklah korban mati tahimpik

dimano bumi  dipijak
disinan langik di junjuang
dek padang acok baroyak
mari kito manjago untuang

panakik pisau sirawik
panabang batang lintabuang
salodang ambik ka nyiru
satitik jadikan lawik
sakapa jadikan gunuang
alam takambang jadi guru

Not:
Berdasarkan catatan sejarah, Padang pernah dihoyak gempa besar tahun 1797 dan tahun 1833 yang di seratai tsunami. Tanggal 30 September 2009 kembali lagi di hoyak gempa besar, dari titik episentrum Sipora.

Menurut pakar gempa Prof. Badrul Mustafa, pusat titik gempa Siberut dalam waktu dekat juga akan melepaskan energinya, kekuatannya bisa jadi mega trust..... Karena rentang waktu siklusnya sudah masuk, maka warga harus bersiap-siap untuk menghadapinya.....

Padang, 10 September 2015
Afma Tampan