Carito Lawak Minang: Pudin di Kaja Anjiang

Carito Lawak Minang: Pudin di Kaja Anjiang

Ilustrasi di Kejar Anjning

Di kampuang Suduik, hari nan paliang gadang satiok tahun adolah hari rayo kurban. Di kampuang Suduik ko ado duo Surau ( mushalla ) dan duo Musajik. Surau partamo banamo Surau Anjuang, surau ko paham e Tarikat Nagsabandi, di surau ko banyak urang basuluik. Puaso jo hari rayonyo tatap dulu dari penetapan pemerintah, sahari atau duo hari. Jamaah surau Anjuang ko indak urang kampuang Suduik se doh, tapi banyak nan datang dari lua Kampuang Suduik.

Surau kaduo banamo surau Lamo, jamaahnyo bapaham syatariah. Biasonyo panatapan bulan puaso atau hari rayo jamaah syatariah ko tatap kudian dari pemerintah, Bilo pemerintah umpamonyo manatapkan hari rayo Idul Adha tgl 24 September, mako jamaah surau Lamo ko akan hari rayo tanggal 25 atau 26 September, atau labiah dikenal dengan mancalik bulan. Jamaah surau Lamo ko banyak nan datang dari lua kampuang Suduik.

Tantang Musajik, partamo banamo Musajik Hidayah Muhammadyah, kaduo Musajik Raya Kampuang Suduik.

Walau ado ampek tampek ibadah di kampuang Suduik tu, tapi kehidupan beragama sabana rukun dan damai. Kilafiah nan babeda ndak pernah dimasalahkan, karano urang kampuang Suduik sabana paham tantang wujuik satu balain jalan, "seluruhnyo ado dasar masing-masing sesuai jo Alquran dan Hadist", baitu kecek urang nan bijak di sinan.

Nan acok jadi masalah hanyolah satiok hari rayo haji atau kurban, panyabab masalah tu dari dulu tatap itu ka itu sajo, yaitu si Pudin.

Sabananyo indak masalah doh,  tapi tapek e buah sabuik. Karano kurenah si Pudin di kampuang Suduik satiok hari rayo kurban tatap jadi buah sabuik urang.

Kalau alah babeda Muhamadyah jo pamerintah, dipastikan sajo ampek kali urang rayo di kampuang suduik tu,  tantu sajo ampek hari pulo urang ba kurban, dan bagi Pudin, dipastikan sajo inyo mambao pulang ampek asoi dagiang tambah ampek kaki jawi.

" Sero bana taun kini mah, rayo haji ko pas lo jo musim asok, bia dagiang kurban nan dapek den buek jadi dagiang asok, supayo tahan lamo", kato Pudin dalam hati.

Hari partamo, urang mamotong kurban di surau Anjuang Nagsabandi, Pudin ko sato lo manyorong jadi tukang potong-potong dagiang, pulangnyo Pudin mambao dagiang sa asoy ditambah jo kaki jawi ciek." Dagiang ko den asokan, kaki e den jua ka tukang sup di pasa", rencana Pudin dalam hati. Rayo haji kini Pudin ko sorang se dirumah, soalnyo inyo sadang genjatan senjata jo induk bareh e nan banamo Lela.

Hari Kaduo urang kurban di Musajik Hidayah Muhamadyah, inyo sato lo lik jadi tukang potong, . Katiko Pudin siang tu alah salasai mamotong dagiang untuk dibagi-bagikan, Pudin malenggang pulang mambao  sa asoy dagiang tambah jo kaki jawi ciek. Di tangah jalan manuju rumah, dek tulang kaki jawi nan direnjeang  si Pudin mambuek tabik aia salero  anjiang rambai pak Soka, manggugulah anjiang rambai pak Soka ko sambia mangaja tulang kaki jawi nan di renjeang Pudin ko. Mancalik anjiang rambai mangaja diri e, tantu sajo Pudin ko tabik takuik, inyo lari cigin dek dikaja anjiang, sakanjang Pudin balari, sakanjang itu pulo anjiang rambai tu mangaja Pudin.

Aksi kaja mangaja antaro Pudin jo anjiang tu jadi tontonan warga, urang basorak ma agih sumangat ka Pudin, katiko Pudin maraso alah litak di kaja anjiang rambai tu, Pudin ko tapaso mamakiak mintak tolong, " tolong gua..... tolong gua....tolong gua...!", kecek Pudin sambia balari.

Mandanga pakiak si Pudin sambia balari di kaja anjiang tu, urang jadi taheran-heran sajo, tapi dek mandaga rarau si Pudin ko tiok sabanta mangecek tolong gua se, tapaso urang turun tangan juo manggua Pudin tu. Tuo mudo urang sakampuang turun tangan mambantu Pudin untuk manggua inyo. Urang yakin sajo manggua Pudin ko, karano Pudin ko mungkin sadang ma tes badan e tahan gua atau indak katiko dikaja anjiang.

Urang baranti manggua Pudin ko katiko inyo mambana, " alah... alah... mambana den..!.", kecek Pudin sambia ma atur angok e nan sasak.

Itulah Pudin, dek sok-sok bahasa Indonesia se, marantau ka batawi hanyo sabulan, tapi caro mangecek labih lo dari urang batawi. Kecekanlah "tolong wakden...!" mungkin indak ka di gua dek urang kampuang doh. 

Padang, 23 September 2015

Afma Tampan